承諾

在紅磡春田街，街坊街里，無一不認識「Lily」婆婆，她的家，是做冷氣水電工程的。街坊們都知道，「Lily」婆婆細細個已經好懂性，每天 朝九晚六，風雨不改的，到店中幫忙看鋪。除了一見無著衫打大赤肋的麻甩佬，會老娘發威破口大罵；又或叨些跟鋪內一樣有售，諸如水喉 通鋁窗之類物件路過的途人甲乙丙，鬧得仲激，從未失職。就算偶爾想鬆鬆腳骨，到街上蹓躂蹓躂，最遠也不會超越陽光廣場，責任心蠻重。

但芳華18的她，可不是人。若按俗語計狗一歲等於人七年的話，高達126歲狗瑞之齡的「Lily」婆婆，年紀大機器壞，四肢不良於行，連坐都成問題。農曆年後曾經絕食絕水，意圖放棄自己。全靠江哥，當年和「Lily」一同成長、今日初為人父的主人，千方百計，又為「Lily」設 計手推輪椅，令「Lily」有行得番的感覺，重拾生趣，不再尋死。

一個毫不驚天地泣鬼神的故事，主角只有一人一狗，卻教旁觀者心頭熱暖。

由於「Lily」婆婆肌肉嚴重衰退，四隻腳軟蹄乏力像濕水油條，根本行唔郁，為激勵其求生意志，江哥從網上參考K-9動物輪椅設計，再因應實際需要修改而成這架手推車版本。「一定要就住佢一日差過一日的狀況再彈性改動，總之要四隻腳踮到地，有自己行得番感覺。」江嫂眼看老公對隻狗比對自己和初生兒子更費勁，一都無嬲：「我聽人講，話男人如果鍾意貓狗細路，唔慌衰嫁得過！」說時一雙眼睛寄予無限柔情。

自我放棄
噩夢，就好似四川地震一樣，來得兇猛。江媽媽憶述約莫過了新正頭無耐，某夜，做慣廳長的「Lily」婆婆想起身飲水，一起身，後腿像斷裂的橡筋，走不動，要靠前肢拖行。睇過獸醫，做過詳盡檢查，心肝脾肺腎各主要功能機件尚好，唯獨年老，敵不過時間，配額用盡，肌肉衰退超乎想像。事實亦始料不及，好快就輪到前肢都有事，也許，「Lily」婆婆無法子接受行將就木的現實，變得很沮喪，不吃不喝，食乜屙乜脫水眼凹，瘦到變狗乾，甚至生滿肉瘡、血管堵塞變黑肌肉壞死含膿，要日日吊鹽水和清洗傷口，精神和心理日益低沉，似要放棄自己終去。


擇善固執
連獸醫都開到口，問要唔要打一針，從此減輕痛楚？「點解要整走佢？你點知佢想走？」完全把身邊人說話當耳邊風的江哥，說「Lily」婆婆在其心目中的重要性，豈止是一隻狗或一隻寵物！「佢睇住我畢業拍拖失戀打第一份工，直到今時今日結婚生埋第一個仔，一直以都俾好 多好多我，佢而家老啦，身體唔好，係咪時候俾個機會我照顧番佢先？」我完全語塞！江嫂細聲對我說，老公每晚放工返屋企食完飯第一件事，並非同BB玩，而係打理狗先。一啖糧一啖水逐羹餵，又按摩又傾偈又盛，晚晚如是搞足兩粒幾鐘；逢星期六日就落鋪頭，話要整架車俾 隻狗。當見到牠坐架車上面以為自己行得番，返到屋企仲肯主動食飯，就吟吟沉沉話以後多帶「Lily」婆婆出街佢開心：「近近地落鋪都好喎！」江嫂說。因為經常要灣身拗腰抱狗，江哥弄至腰骨赤赤痛！「我只係想幫佢撐耐些，希望佢將來睇到我第二個仔出世！」語氣倔強固執硬頸過牛，觀點與角度，是對是錯… …只有天知道。